"Залуу судлаачдыг дэмжих сан" ТББ-ын гүйцэтгэж буй “Байгууллага зорилгоо тогтвортой хэрэгжүүлэхэд шаардлагатай цалин хөлс хангамж  урамшууллын тогтолцооны жишиг загвар боловсруулах нь” судалгааны багийн боловсруулсан дараах шийдлүүд дээр саналаа өгөөрэй.

Байгууллагын цалин хөлс, хангамж, урамшууллын тогтолцооны зорилго:  

• Байгууллагын нэгдмэл зорилгыг хэрэгжүүлэх үйл ажиллагаанд үүрэг гүйцэтгэж буй ажилтнуудыг тогтвортой, үр дүнтэй ажиллахад сэдэлжүүлэх, бүтээсэн үнэ цэнийг тогтмол үнэлэх замаар өрсөлдөхүйц нөхцлөөр харилцан үр шим хүртэх

Судалгааны тулгуур ойлголтууд:

1. Байгууллага - Нэгдмэл зорилгыг хэрэгжүүлэхэд харилцан уялдаатай үүрэг гүйцэтгэж, үр шим хүртэх зорилготой хүмүүсийн цэгцтэй үйл ажиллагааны бүтэц

2. Нэгдмэл зорилго - Оролцогч талууд харилцан хүлээн зөвшөөрсөн зарчмуудад нийцүүлэн, нийтлэг ашиг сонирхлыг тусгаж, нэг мөр ойлгогдохоор томьёолсон зорилго

3. Хэрэгжүүлэх - Нэгдмэл зорилгыг тодорхой хугацаанд төлөвлөсөн түвшинд хүргэхэд шаардлагатай ажлуудыг тодорхойлох, төлөвлөх, гүйцэтгэх, мониторинг хийх, дүгнэх, оношлох, сайжруулах цогц үйл ажиллагаа

4. Шаардлага - Тодорхой зорилгыг хэрэгжүүлэхийн тулд зайлшгүй бүрдүүлвэл зохих хэм хэмжээ

5. Цалин - Ажил олгогчоос нэгдмэл зорилгыг хэрэгжүүлэх үйл ажиллагаанд үүрэг хүлээн оролцож буй ажилтны үүргийн гүйцэтгэл, түүний үр дүнг тухайн ажилтны алдагдсан боломжийн өртөгтэй уялдуулан тооцож, харилцан тохиролцсон тогтмол олгох мөнгөн төлбөр

6. Хөлс - Тодорхой зорилгыг хэрэгжүүлэхэд шаардлагатай нөөцийг бүрдүүлэх зорилгоор богино хугацааны гэрээнд үндэслэн ажил гүйцэтгэгчид олгож буй төлбөр

7. Хангамж - Оролцогч талууд үүргээ гүйцэтгэхэд зайлшгүй шаардлагатай нөхцөлийг бүрдүүлэх нөөц

8. Урамшуулал - Нэгдмэл зорилгыг хэрэгжүүлэх үйл ажиллагаанд оролцогч талуудыг үүргээ тогтвортой, үр дүнтэй гүйцэтгэхэд сэдэлжүүлэх зорилгоор бусад оролцогч талуудаас хүртээх үр шим

9. Үр шим - Нэгдмэл зорилгыг хэрэгжүүлэхэд үүрэг гүйцэтгэснээр оролцогч талуудад бий болох харьцангуй давуу тал.